Bagong papel kan parokya, uya na!!!

by AYLA LUNAR

ILULUNSAR sa Enero 7, 2007, Domingo, Kapistahan kan Epifania an “PROBATICA: An lugar ni Santa Ana,” an opisyal na papel kan parokya ni Santa Ana, Magarao, sa Misa alas-7:30 nin aga sa simbahan.

An paglunsar asin pagpublikar na ini gikan sa kabotan kan kura paroko, si Msgr. Juan N. Buentiempo. An katuyohan kan bagong papel sabi ni Msgr. Buentiempo iyo an “pagpahayag o pagpabalangibog kan Marahay na Bareta ngonyan na panahon kan pag-uswag kan teknolohiya; tanganing ipalakop asin ipaaram an mga importanteng aktibidades, notisya asin impormasyon sa mga parokyano, asin para sa pagsaray kan mga mahalagang rekord asin dokumento kan parokya.”

Sa mga pinagpilian na magigin ngaran, minawot ni Msgr. Buentiempo na apodon ining “PROBATICA: An lugar ni Santa Ana” na magsisirbing rekognisyon sa mahal na patrona kan parokya na si Santa Ana, an ina ni Birhen Maria.

“Inaasahan ko na magin matagumpay an gigibohon na paglunsar asin magin dakulang Xtabang ini para sa mga parokyano,” an sabi kan kura paroko.