by Msgr. Juan N. Buentiempo,P.C.
Sarong dakulang kaogmahan na ngonyan namundag an bagong ‘newsleter’ kan satong parokya!
Huli sa kaskas na pag-asenso kan teknolohiya ngonyan na panahon, pwedeng sabihon na an paggibo asin pagpaluwas kan papel na ini huri na. Alagad, huli man ta an mayor na katuyohan kan paggibo kaini iyo an pagpahayag asin an pagpabalangibog kan kahadean nin Diyos, dai ini mahuhuri huli ta an mensaheng dinadara iyo an Marahay na Bareta nin satong Kagurangnan.
Kaya, an PROBATICA: An lugar ni Santa Ana sarong dakulang balaog para sa parokya nin Magarao. Ini man an satong magayon na dolot sa Mahal na Diyos na namundag ngonyan na Pasko. Sa pag-abot kan papel na ini sa saindong mga kamot dara an mensahe na an Diyos man nanggad uya, namomoot sa sato, sa tahaw nin gabos na pangyayari sa buhay.
Uminagi pa sana an makukusog na bagyo na nagwalat nin dakul na destroso. Alagad, padagos an buhay nyato! Ini nagpapasabot na umagi man an kalamidad asin trahedya sa sato, anoman na problema an mag-abot, padagos an Pasko. Mayo man nanggad makakadaog sa espiritu kan pagkamundag kan satong Kagurangnan. Huli ta sa selebrasyon na ini, dakulang kayamanan an satong inaako – an pagkamoot nin Diyos na ihineras sato gabos.
Maogmang Pasko!!!
(Msgr. Buentiempo is the Parish Priest of St. Anne, Magarao since year 2000.)
No comments:
Post a Comment