Brgy. Sta. Lucia nagfiesta

by JUDY BELLEZA

STA. LUCIA, Magarao – Kan Disyembre 13, an mga parokyano kan barangay nagselebrar kan kapistahan kan saindang patrona, si Sta. Lucia, sa paagi nin Santa Misa.

Pinunan an paggiromdom sa kaaldawan kan patrona sa paagi kan mga minasunod: siyam na aldaw na Banal na Misa sa kapilya kan barangay kada ika-4:30 nin hapon; an pagnobena; asin an pagprusisyon kan imahen ni Sta. Lucia. Sa siyam na banging paglibot kan imahen ni Sta. Lucia sa bilog na barangay, dakul na mga residentes an nakisumaro minsan ngani madiklom an kabanggihan sa kawaran nin supply nin kuryente huli sa nakaaging bagyong si ‘Reming.’

Sa homiliya ni Msgr. Juan Bientiempo, an kura paroko kan Magarao, pinamidbid niya sinda “Agatha,” “Euthiquia,” asin “Lucia.” Si Lucia nagin Santa huli sa saiyang makusog na pagtubod sa Diyos asin sa saiyang pagigin sarong Kristyano. Dawa anong pasakit an gibohon saiya dai nanggad mababari an saiyang pagtubod. Si Euthiquia, an may helang na ina ni Sta. Lucia, narahay huli sa debosyon ni Sta. Lucia ki Agatha.

Sinabi pa ni Msgr. Buentiempo, “Lugod magin arog kita ni Sta. Lucia – pusog an pagtubod sa Diyos na dawa anong kasakitan o kalamidad an mag-agi, satuya ining malalampasan.”

An Barangay Pastoral Council sa pamamayo ni Ms. Arsenia S. Tocloy asin an Sta. Lucia Youth Organization sa pamamayo ni Pascual Patrick A. Belleza boot na ipaabot an dakulang pasasalamat sa gabos na nagtarabang na magin maogma an selebrasyon kan kapistahan.