“Magbakli. Makipag-olian. Makisumaro."

Kan Pebrero 21, Miercoles de Ceniza, pinonan nyato an panahon nin Cuaresma – an panahon nin pag-ayuno asin pagpamibi. An panahon na ini igwa nin 40 aldaw, kaya inaapod na Cuaresma sa Español asin Quadragessima sa Latin.

An numerong 40 madalas maisihan sa bibliya asin minapahayag nin panahon nin makuring pag-andam, o panahon nin pagkastigo na gikan sa Dios. Sa Bagong Tipan, si Jesus nagpamibi asin nag-ayuno sa laog nin 40 aldaw asin 40 banggi sa disyerto sa pag-andam sa saiyang ministeryo.

Sa pagsunod ki Jesus, kita man na mga Kristyano, lalong-lalo na an mga Katoliko, inaapodan sa maimbod na pagpamibi, paghorop-horop sa Banal na Kasuratan, pag-ayuno asin paglimos. An pagbago nin buhay, nin isip asin puso, minapoon sa sarong pagpagamiaw sa pagsolsol. Ini sinisimbolo kan mga abo sa angog. Mantang an abo nilalaag sa angog sa pormang krus, an selebrante minasabi: “Magsolsol asin magtubod sa Marahay na Bareta” (Mk. 1:15).

Mayaman an satong simbahan sa paggiya asin pagtao nin oportunidad sa mga tawo para sa maimbod na pagsabuhay kan espiritu nin pagsolsol asin pagbago nin buhay ngonyan na Cuaresma. Igwa kita nin mga aldaw nin pag-ayuno asin pag-abstinensya – an Miercoles de Ceniza, Biernes Santo asin mga Biyernes kan Cuaresma. Sa satong parokya ginigibo an Pag-estasyon o an Dalan nin Krus sa patio kan simbahan kun Domingo asin sa mga Barangay sa talaan na mga aldaw. Asin sa Abril 1, poponan nyato an Semana Santa, sarong semanang paggiromdom, paghorop-horop asin pagsabuhay kan pagsakit, pagkagadan asin pagkabuhay-liwat ni Cristo sa paagi kan mga selebrasyon-liturhical sa simbahan.

Logod, tandaan nyato na an pagsabuhay kan tunay na espiritu nin Cuaresma dai mahihimo sana kan pagtiripon kan pamilya o pagbakasyon sa magagayon na lugar kun Semana Santa, kundi an maimbod na pagsolsol sa sadiri, an pusog na desisyon nin pagbago nin buhay, asin an pakisumaro sa mga selebrasyon-liturhikal asin pag-utob kan mga tugon kan Simbahan. Magbakli kan sadiri. Makipag-olian sa Dios asin sa kapwa. Makisumaro sa Simbahan!

Aki asin Gurang: Ladawan nin Pagkamoot

Kan Enero, maogma nyatong sinelebrar an kapistahan ni Sto. Niño, okasyon para sa mga kaakian. Ngonyan na Pebrero, sato man na sineselebrar an World Day of the Sick (Feb. 11), okasyon para sa mga gurang asin naghehelang. Asin an bulan na ini bulan nin pagkamoot huli kan Valentine’s day. Kun kaya, satong minawot na an tema nyato sa isyung ngonyan iyo, “An Pagkamoot kan mga Aki asin mga Magurang sa Buhay nin Simbahan.”

An mga kaakian asin mga gurang mahalagang kaayon kan Simbahan. An mga aki, sa saindang pagigin inosente asin bilog na pagsarig sa magurang nagigin pangarogan kan gabos na magpakumbaba asin bilog na magsarig sa Dios. Kun kaya, tinugon mismo ni Jesus, “Kun dai kamo magbakle asin magin siring sa mga aking sadit, dai nanggad kamo makakalaog sa Kahadean nin langit” (Mt. 18:3). Siringman, binoot Niya, “Pabayae nindong magdolok sako an mga aki” (Mt. 19:14).

An mga gurang, huli kan saindang mahiwas na experyensya sa buhay, orog na igwa nin mahalagang dolot sa komunidad kan Simbahan. Sinda “danay na mabunga, maski gurang na” (Ps. 92:14). Yaon sainda an pagigin matinao na dai naghahalat na balsan; an mas kumpletong paghiling sa buhay; an pagtao nin halaga sa simpleng pagbuhay; asin an mas relihiyosong pagsamba sa Kagurangnan. Ini asin an dakul pang mga karisma kan gurang na edad iyo an kaipuhan man na pangarogan.

Sa mga karahayan na ini minasupay an pagkamoot na ipinapahiling kan mga kaakian asin kamagurangnan. An pagsabuhay kaini iyo an magiya sa gabos sa dalan nin mas hararom na pagkamidbid asin pagkamoot sa Dios.
Sa tabang ni Santa Ana, ni Santa Maria saiyang aki, asin ni Jesus na saiyang maku-apo, maipahiling man nyato an pagkamoot sa satong mga gurang asin kaaikan.

2007: Pasasalamat asin Paglaom

Bagong Taon. Bagong balaog. Bagong paglaom.

Pinuponan nyato an bagong taon na winaras sato kan Mahal na Diyos. Sabaton nyato ini sa espiritu nin pagpasalamat sa nakaagi asin paglaom sa maabot.

Bilang sarong parokya, pano kita nin pasasalamat huli ta nagin mabiyaya an taon 2006 sa satong buhay-pagtubod: an pagsungko kan obispo-auxiliar kan Caceres na si Msgr. Jose Rojas; an paglunsar kan librong An Buhay ni Santa Ana; an pag-organisar kan bagong Pastoral Council Executive Board; an pag-instalar kan Confraternity of Saint Anne; an pagpundar kan children’s choir; an panggana kan St. Anne Football Club bako lang digdi sa Bikol kundi man sa Cebu asin Manila; an dakul na mga binonyagan asin kinasal; asin dakul pang iba.

Uminagi man kita sa sakit huli kan mangirhat na trahedyang dolot kan makukusog na bagyo, an padagos na paglangkaw kan gasolina asin mga barakalon, an ribok sa politika, an iriwal asin pagkabaranga sa pamilya, asin an mga personal na problema.

Alagad, dai magagaba kan mga ini an paglaom nyato. An tipikal na Pilipino, Bikolano asin Magaraoeño pirmi sanang maogma asin madaling mag-ogma minsan sa tahaw nin trahedya. Kita nagtutubod na maabot an panahon na an gabos maaayos. Sa pagpoon kan taon yaon an satong pagtiwala sa mga lideres nyato, kan banwaan asin kan simbahan. Kaipuhan nindang romdomon na dai mawara an paglaom na ini.

Dakul an kaipuhan na gibohon ngonyan na 2007: an Pastoral Council binibilog an plano kan mga proyekto asin aktibidades sa bilog na taon; maandam an bilog na banwaan sa maabot na eleksyon; an simbahan kaipuhan na padagos na tapuson; asin an lambang saro may responsibilidad na ayoson an sadiri asin an saiyang pamilya.

An gibohon halaba asin dakul. Alagad kun an kaogmahan na mahiling na an mga paglaom kan Magaraoeño nahihimo, maninigong gayong pagmaigotan ini. Pagkatapos kan taon 2007, kaipuhan na magin tanos an tindog nyato sa katotoohan na an satong paglaom sa pagpoon kan taon buhay asin nautob.

Sa espiritu nin pamibi asin pagpasalamat sa Kagurangnan sa balaog nin bagong taon, kaibanan si Maria, an Ina nin Diyos, asin si Santa Ana, magdanay kita sa paglaom huli kan satong bilog na pagsarig, pagtubod asin pagkamoot sa Mahal na Diyos.

Maogma asin mabiyayang Bagong Taon!

Editorial: "Diyos sa tahaw nin pagtios"

by Erwin Blasa

Kan nakaaging duwang bulan, niradas an Kabikolan nin duwang makusog na bagyo, Milenyo asin Reming. Sa Magarao sana, sobra sa sangribong harong an nagkagaraba. Sa ibang parte kan Bikol, asin huli pa kan mudflow sa Albay, ribong buhay an nawara, gatos na tawo an nalugadan, dakul na harong an nagaba, mga uma asin infrastractura naraot, nagkakapira an naghelang, nagutom, namundo.

Alagad, bakò nang bago an mga trahedya asin kalamidad para sa mga Bikolano. Kan nakaaging mga taon, dakul nang makusog asin maringhat na kalamidad an uminagi. Alagad, an mga Bikolano nakanuod nang atubangon an mga ini. Dakul an mga danyos, alagad an buhay padagos!

Sa trahedyang ini, dakul man an napukawan sa pagtubod. Mga tawo dai lang minaagrangay sa Mahal na Diyos, kundi man minaduda na sa karahayan nin Diyos. Haen an Diyos? Kun an Diyos orog na marahayon, tano ta tinutogotan Niya na mangyari an mga ini: dakul na aki, mga matanos, nagpapakabanal nadadamay sa kasakitan?

Sinasabi na dawa yaon an katiosan sa pagsakit, igwa man ini nin mga karahayan: ini pwedeng sarong pagprobar kan pagsarig sa Diyos, ini pwedeng magtao nin pagdisiplina, asin ini man pwedeng sarong misteryo nin pagkamoot nin Diyos.

Bilang misteryo, an imahen nin Diyos mahihiling sa mga tawong nagmamaigot. Kan nakaaging bagyo, dakul na mga matinaong tawo, organisasyon asin grupo an nagpadara kan materyal na suporta, nagkakapira an personal asin boluntad na nagtabang, asin orog pang dakul an nagdolot nin mga pamibi.

Ngonyan na Pasko, magin gibo ta man lugod an magtao nin gaweng-herak para sa mga tugang nyatong nangangaipo, tanganing mahiling ninda na si Jesus uya man nanggad sa sato gabos.