by JUDY BELLEZA
KAN ENERO 22-26, 451 mga kaakian an nag-ako kan primerong komunyon sa Parokya ni Santa Ana, Magarao.
Nakabado nin puti, ginibo kan mga aki an enot nindang pagkumpisal sa padi asin inako an kakanon nin bagong buhay, an hawak asin dugo ni Jesus, sa paagi kan banal na komunyon sa laog kan Santa Misa. An pag-ako kan komunyon iyo an kapinonan kan habangbuhay na pakikipagmidbiran ki Jesus asin pagbaklay kaibanan Niya.
“Maogmahon po ako!” an sabi ni Reynald Anay, 9, kan barangay San Pataleon, pagkatapos kan selebrasyon. Kan hinapot kun ano na an saiyang gigibohon pagkatapos kaini, an sabi niya, “Padagos po akong matubod sa mga pangadal kan Simbahan bilang Kristyano asin matabang sa pagpabalangibog kan Tataramon nin Kagurangnan.” Dagdag pa niya, “Ako pirming makumpisal kan sakong magabat na kasalan bago mag-ako kan hawak ni Kristo.” Sa lumbod na isip pa lang, yaon na sa mga kaakian an kamawotan kan pagpapakabanal.
An mga aki na nasa ikatolong grado kan pitong elementaryang eskwelahan sa Magarao inandam kan Parish Catechetical Ministry sa pamamayo ni Mrs. Celeste Banday para sa maninigong pag-ako kan komunyon. An mga aki nag-agi nin regular na katekesis manungod sa buhay-Kristyano, e.g. sakramento nin Simbahan, orog na an banal na Misa asin an pagkumpisal.
An mga aldaw kan selebrasyon asin an bilang kan mga aking nag-ako kan komunyon iyo an mga minasunod: Bell-San Francisco Elementary School (Jan. 22), 97 children-communicants; Magarao Central School (Jan. 23), 161; Carangcang Elem. School (Jan 24), 51; Sta. Lucia Elem. School (Jan 24), 63; Ponong Integrated School (Jan 26), 24; asin Casuray Elem. School (Jan 26), 55.
No comments:
Post a Comment