Friday, March 30, 2007

Oras asin Panahon: Regalo nin Diyos


Ngonyan na bagong taon, satong paghorop-horopan an kahalagahan kan oras o panahon, the value of time. Igwang sarong magayon na parabola* manungod sa pagsabat kan bagong taon.

Sa enot na aldaw, naglalang an Diyos nin damulag. Sabi niya, “Magduman ka sa daga kaibanan an parauma, bilog na aldaw ika masakit sa init kan saldang, magkakaigwang mga kalyo an saimong kamot asin bitis, asin matao kang gatas tanganing suportahan an saimong among, asin tatawan takang 60ng taon para mabuhay.”

An sabi kan damulag, “Masakit man na maray an buhay na iyan na gusto mo sako. Tawi akong 20ng taon sana, asin itatao ko saimo an tadang 40.” Asin nag-uyon an Diyos.

Sa ikaduwang aldaw nilalang nin Diyos an ido. Sabi niya, “Magtukaw ka bilog na aldaw sa pwertahan kan saimong harong asin batokon mo an siisay man na maglaog o maki-agi. Tawan takang 20ng taon.” An sabi kan ido, “Halawigon na yan na panahon nin pagparabatok. Tawi ako nin 10ng taon, asin iuuli ko an tadang 10.” Asin nag-uyon an Diyos.

Sa ikatolong aldaw, nilalang nin Diyos an kabalang. Sabi niya, “Paogmahon mo an mga tawo, maggibo ka nin mga monkey tricks, pangisihon mo sinda. Tawan takang 20ng taon nin buhay.” An sabi kan kabalang, “Boring naman yan monkey tricks sa 20ng taon? Binalik saimo kan ido an 10ng taon, iyo man iyan an gibohon ko, okay?” Nag-uyon an Diyos.

Sa ikaapat na aldaw nilalang nin Diyos an tawo. Sabi nin Diyos, “Magkakan ka, magturog, magkawat, mag-enjoy! Mayo kang ibang gigibohon kundi an magpasiram-siram sa buhay. Tawan takang 20ng taon.” An sabi kan tawo, “Ano? 20ng taon lang? Dae ko! Uya, akoon ko an 20, hagadon ko an hinaboan na 40 kan damulag, an 10 kan ido, asin an 10 pang hinaboan kan kabalang. Kaya bale 80 gabos, K?” “Deal!” uyon kan Diyos.

Kaya iyo iyan, sa enot na 20ng taon kita minakakan, minaturog, minakawat, asin nag-eenjoy sa buhay; sa sunod na 40ng taon minatrabaho kita sa irarum kan saldang tanganing suportahan an satong pamilya; sa sunod na 10ng taon gumigibo kita kan monkey tricks tanganing paogmahon an satong mga apo; asin sa huring 10ng taon minatukaw kita sa atubangan kan satong harong asin minabatok sa kun kiisay na mahiling!

Mga tugang, minapoon kita kan balaog nin bagong taon. Ini gikan sa satong Makakamhan na Diyos. Ano an ginigibo nyato sa satong oras asin panahon? Ano iyan uyon sa katuyuhan kan paglalang sa sato asin sa kabotan nin Kagurangnan? Sa anong kabtang ka na kan saimong panahon? Sa damulag, sa kabalang, sa ido? Ano an ginigibo mo?

Sinasabi na tinatawan kita nin mga 25,000ng aldaw para mabuhay. An iba kaini naubos na. Alagad, an Bagong Taon, pinapara an gabos na nakaagi asin minadolot nin nagliliwanag na 365ng aldaw. Ano, inaako mo ining dolot na ini? Ano an gigibohon mo sa saimong oras o panahon? Sabi kayan, “Masupog kamong magadan na mayo man lang na naginibohan!”

Lugod sa pagpoon nyato kan taon, pahalagahan nyato an satong oras asin panahon huli ta ini biyaya nin Diyos sa sato.

* See William J. Bausch, 40 More Seasonal Homilies. Mystic, CT: Twenty-third Puiblications, 2005, 17-18.

No comments: