Bagong Taon kaiba si Santa Ana

Dakulang onra para sakuya an maka-contribuir sa isyung ini kan satuyang pamparokyang newsletter.

Sa taon 2006, dakul na biyaya an satong naako hale sa Kagurangnan huli kan satuyang patrona, si Santa Ana. Kaya odok sa boot man an pagpasalamat nyato. Duwa sa mga biyayang ini iyo an pagsungko kan satuyang obispo-auxiliar sa Caceres, si Mons. Jose Rojas, kan Mayo 14. An ikaduwa iyo an pagluwas sa aldaw man sanang ini kan libro manungod sa buhay ni Sta. Ana (An Buhay ni Santa Ana, binikol ni Erwin Blasa). Ngonyan, sa pagpoon kan Bagong Taon, inilulunsar nyato an satong newsletter, sarong panuga nin dakul pang mga biyaya an maabot ngonyan na 2007.

An mga ini patunay lamang na kun madanay kita sa paghigos sa paglingkod sa Kagurangnan, saiyang papabungahon an satuyang mga paghingowa, nin huli ta an Diyos sana ang nagpapatubo asin nagpapabunga kan satuyang mga trabaho (1 Cor. 3:6-7). Iyo ini ang mahihiling nyato sa buhay ni Santa Ana. Danay an saiyang paglingkod sa Kagurangnan, maski ngani sa haloy na panahon, garo baga mayo nin bunga, nin huli ngani ta mayo sindang aki kan saiyang agom na si San Joaquin (An Buhay ni Santa Ana, k. 2). Alagad, igwa palan nin dakula asin makangangalas na plano para sainda an Mahal na Diyos. Itinao sainda an orog kahalangkaw na biyaya na magin mga magurang kan magiging Ina nin Diyos, si Maria Santisima. Totoo man nanggad an sabi ni San Pablo: “Aram nyato na an Diyos minagibo para sa karahayan sa gabos na namomoot saiya, sainda na mga inapod sosog sa saiyang mga plano” (Rom. 8:28).

Kaya sa pagpoon kan kaining Bagong Taon 2007, hagadon nyato sa Mahal na Diyos, sa tabang kan pamibi ni Santa Ana, na orog na maging pusog an satong pagtubod, na “magin makusog kita sa Kagurangnan asin sa kusog kan saiyang kabagsikan (Ef. 6:10).” Siring ki Santa Ana asin sa saiyang esposo na si San Joaquin, magdanay lugod kita sa paglingkod sa Kagurangnan, pano nin pagsarig. Masirbe kita sa Mahal na Diyos minsan sa tahaw nin mga pag-alang-alang asin mga pag-alaman, nin huli ta aram nyato sa pagtubod na an Diyos igwa nin inaandam na mga makangangalas asin maka-oroogmang mga bagay para sa sato. Asin an mga biyaya na satuyang maako satuya man na iheheras sa mga tugang nyato na nangangaipo.

Sa pamayo kan satuyang kura paroko, Mons. Juan Buentiempo, ipadagos nyato an maogmang paglingkod sa Kagurangnan asin sa saiyang banwaan!