Saturday, March 31, 2007

Msgr. Buentiempo nagselebrar kompleanyo






Sarong dakulang urgolyo an sakong namatean kan ako naimbitaran sa selebrasyon kan kompleanyo kan satong kura paroko, si Msgr. Juan Buentiempo kan nakaaging Martes, Pebrero 27, 2007, sa kumbento kan parokya. Dakul na mga bisita an sakong naabotan: nagkapirang padi sa Caceres, mga parokyano kan Santa Ana, mga kaakian, asin mga kapamilya ni Monsigñor na maorogmang nakiselebrar.

Sa sakuyang paghiling, an satong Kura Paroko na naglingkod sa Par
okya ni Sta. Ana nin haros 9 na taon na poon kan Oktubre 1998, sarong simpleng tao.

Istorya kan sarong padi, “Si Mamo (an apod ki Monsignor) ngonyan na sanang mga taon nagusto na magselebrar kan saiyang kompleanyo. Huli ta kan kami mga seminarista pa sana, amay kaming nagmamata para mag-mañanita saiya sa may pwertahan kan saiyang kwarto. Alagad naaaraman mi na mayo man palan siya sa laog.” Kan hinapot ko si Mamo kun tano ta siya minahale sa aldaw kan saiyang kompleanyo, siya nagsimbag, “Kun saimong kompleanyo, gabos na tawo nagsisibot, minagastos, para saimo. Ika an ‘star.’ Habo kong pagkasiributan.”


Alagad, sarong pagkakataon, sinabihan siya ni Bishop Balce, “Dai ka na magtago
kun kaaldawan kan saimong kompleanyo. Let the people come and greet you. Ini an saindang paagi para makapagpasalamat sa saimo.” Saiya ining tinubod.

Nagka-igwa ako nin pagkakataon na maka-olay si “May Kikay” (Mrs. Francisca
N. Belleza) nin nagkapirang minuto asin sakong naihapot an manongod sa kun ano kaidto an satong Kura Paroko.

Sabi ni May Kikay, “Kan aki pa si Juan (an apod saiya kan saiyang kapamilya), nagkapirang senyales an sakong nahiling na siya magpapadion. Arog kan paglaag nin katsa bilang saiyang sotana asin an pag-aktong padi na nagmimisa kun ini solo sana; an pag-ukit sa kahoy nin imahen kan mga santo; an pagsakristan niya asin an pagkanuod kan mga Latin na mga pamibion; asin orog kaini, an pagsabi niya, “Gusto ko na maging Padi.’”


Si Alejandro Juan N. Buentiempo (“Juan,” “Johnny,” “Good Time,” “Mamo”) namundag kan Pebrero 27, 1948 sa Napawon, Goa, Camarines Sur, ikaduwa sa apat na magturugang. Si Mamo nagtapos kan saiyang elementarya na sarong achiever sa Goa Elemetary School. Saiyang ipinadagos an High School sa Partido High School. Kan taon 1963, siya luminaog sa Seminaryo na pusog an paglaom sa kabotan asin pangataman nin Dios. Si Mamo inordinahan bilang padi kan Marso 24, 1974 digdi sa Arkidiocesis nin Caceres. Pagkatapos kan pag-orden, siya nagklase nin Civil Engineering sa University of Nueva Caceres.

Kabali sa saiyang mga nagin assignments bilang padi iyo an mga minasunod: Formator kan Holy Rosary Minor Seminary, assistant priest sa Basilica Minore, asin parish priest sa Caramoan asin Iriga City.

Kan kami nag-orolay-olay bago pa kan saiyang kompleanyo, sakuyang nahiling na an saiyang oro-aldaw na pagkabuhay minalipas arog man satong mga layko. Alagad, an saiyang personal na disiplina sa salud; an hilig niya sa pagbasa nin manlaen-laen na libro; an mga ataman asin pag-iriba niya sa kumbento; an saiyang dai-matawaran na engineering skills; asin orog nang gayo an saiyang kakaibang talento sa akrobatiko na iyo an tripod (an pagtindog na baliktad kun sain an payo niya nasa daga na nakapatong sa saiyang mga kamot) -- iyo an mga bagong bagay na sakong naaraman.

Sa saiyang mensahe sa programa kan saiyang kompleanyo, sinabi niya, “Naapreciar ko an birthday message na sinabi sako kan saro saindo, ‘Mamo, Thank you for the simple life.’” An simpleng pagkabuhay iyo an nangongorog na prinsipyo asin gawe kan saiyang pagkabuhay. Dagdag pa kaiyan sinabi niya, “Pinagmamawot ko na ako pirming yaon saindo digdi sa simbahan, digdi sa kumbento. Ini tanganing bilog na mapaglingkodan kamo. Yaon ako digdi tanganing masimbagan an saindong pangangaipohan.” Sinabi niya pa sa samong pag-orolay, “Para sako, the vow of poverty is availability – to be fully present to the persons whom you serve.”

Si Msgr. Johnny sarong ladawan nin simpleng surogoon nin Dios. An sinasabi sa ebanghelyo ni Lukas 5:4 na Duc in Altum (Put out into the deep) saiyang isinasabuhay sa paagui kan pagpararom kan simple alagad maogmang pagkabuhay na iyo an minataong inspirasyon sa saiyang mga parokyano.

No comments: