by Niño Fortuna
AN PAROKYA NI SANTA Ana, Magarao, mapoon kan pag-via crucis o pag-estasyon sa kada barangay ngonyan na Domingo, Marso 4, sa Brgy. Carangcang.
An programang ini pinonan kan taon 2000 kan pag-abot ni Msgr. Buentiempo sa Magarao bilang kura paroko. Poon kaidto ginigibo na ining taon-taon na aktibidad. An mga opisyales kan Brgy. Pastoral Council (BPC) iyo an nagmamanehar kan nasabing programa. Alagad ini nasa pamamayo ngonyan kan mga Apostoles kan parokya sa pangengenotan ni Mr. Rafael A. Sambo.
Igwa nin mga krus na pinapatindog sa gilid kan tinampo kan barangay. Ini an ginagamit na mga estasyon. Sa giya kan mga krus na ini, an mga tawo minalibot sa barangay sa pag-estasyon sa pamamayo kan padi, asin sa tabang kan BPC asin lectors kan barangay. May mga pamilya, an ama, ina asin aki, na nakatalaan na magbasa kan mga pamibi sa estasyon.
An “Via Crucis” sarong tataramon na Latin na an boot sabihon, “an dalan nin krus.” Sa gaweng ini, ginigiromdom asin sinusundan an mga inagihan ni Jesukristo habang siya naglalakaw dara an Mahal na krus pasiring sa Calvario, an lugar na kun saen siya nagadan alagad kita man nailigtas sa kasalan.
No comments:
Post a Comment