Si Sto. Niño, an aking si Jesus, iyo an patron kan mga kaakian. An kapistahan niya kaaldawan man kan mga aki.
Kan Enero 21, Domingo nin kapistahan kan Sto. Niño, nagsimba ako sa Magarao alas-4:30 nin hapon. Dai ko inaasahan, inimbitaran akong magbasa kan pamibi nin banwaan. Maogma kong inako ini. Asin mas-naogma pa ako kan sakong mabasa na an mga pamibi para sa mga aki, “Para sa mga kaakian na napipiritan na manlimos, maghanap nin kakanon, maggibo nin magagabat na trabaho, o ibenta an saindang hawak: magkaigwa man sinda nin maginhawang buhay asin makahawas sa pagtios asin kawaran nin pag-asa.” Ini nagdara sako na romdomon man an ibang mga kaakian.
Si Sto. Niño sarong ladawan na satong pangarogan na magin tunay na Kristyano. Sinasabing kita kaipuhan magin arog sa mga aki bilang mga tagasunod nin Kagurangnan. An mga aki simple, makinuyog-kuyog, honesto, asin may dakulang pagkatakot sa Diyos, saka dai sinda nagmamawot nin dakul na materyal na kayamanan asin pagsasadiri. Sinda kuntento na sa mga simpleng kaogmahan. Sa mga bagay na ini, kita man inaapudan na mabuhay siring sainda.
Sa mga kapwa ko kaakian, lugod padagos tang mabisto si Sto. Niño asin pirmi kitang magin harani saiya.
(An nagsurat Grade 5-Sapphire sa Magarao Central School.)
No comments:
Post a Comment