Pinunan an Cuaresma kan Miercoles de Ceniza


ni Judy Belleza

21 PEBRERO 2007 – Sa tataramon na “Magsolsol asin magin maimbod sa Marahay na Bareta” o “Giromdoma na ika abo asin sa abo ika mabalik,” an itum na abo nilahid sa mga angog kan mga Katoliko sa aldaw nin Miercoles de Ceniza.

Sa aldaw na ini pinoponan an Cuaresma, an 40 aldaw nin pagpamibi, pag-ayuno asin paglimos bilang pag-andam sa Domingo nin Pagkabuhay-Liwat ni Kristo.

“Magsolsol kita kan satong mga kasalan asin magbakli kan sadiri. Magpatawad kita sa satong kapwa na nagkasala sato,” an sabi ni Padre Larry Mijares, an parochial vicar kan parokya ni Santa Ana sa Magarao, sa saiyang homiliya. Pinagtungkosan ni Padre Larry an maimbod na pagbakli kan mga salang gawe asin an pakipag-olian sa kapwa asin sa Mahal na Dios.

“Sa kada taon nin pag-ako ko kan abo na nilalahid sa sakong angog, namamatean ko an pagbago kan sakong sadiri,” an sabi ni Ms. Mamerta San Andres, an haloy nang katekista kan parokya.

Sa liturhiya kan Miercoles de Ceniza, an mga parasimba minamarkahan sa angog kan krus na gikan sa abo bilang tanda nin pagpenitensya asin moralidad.

An paggamit kan mga abo, na gikan sa pagsolo kan mga palmera na ginamit kan nakaaging Domingo de Ramos (Palm Sunday), makahulugan na maray. Sinisimbolo kaini an kagadanan asin minapagiromdom sato kan satong moralidad.

Sa mga Katolikong Simbahan, an mga parasimba minahale na igwa nin marka na yaon sa angog tanganing darhon an tanda nin krus sa bilog na kinaban. Asin an pagpara kaini sarong tanda man kan paglinig sa mga kasalan.