Saturday, March 31, 2007

Pagkamoot sa Paglingkod

by Kenee Sambo

Nakatukaw sa sarong dakulang sofa sa sala na may lanob kun saen nakasabit an mga retrato kan paggradwar kan mga aki, si Nanay Placer Galvo, nagsaysay kan saiyang buhay nin paglingkod sa simbahan asin sa saiyang presenteng kamugtakan. An saiyang pinagduonan na tataramon: “An paglingkod sa Kagurangnan nagtatao sako nin biyaya asin dakulang kaogmahan.”

Si Nanay Placer, 71, dating public school teacher sa Magarao. Sa simbahan, siya nagin kaayon kan dakul na organisasyon. Siya nagin presidente kan Parish Pastoral Council sa laog nin duwang taon kan panahon ni Fr. Lorenzo de los Santos (1994-1996). Ngonyan si Nay Placer saro sa unit heads asin talk-giver kan Handmaids of the Lord, asin board member kan MBG asin CWL.

Sarong dakulang kaogmahan ni Nay Placer iyo an pagkakaigwa nin aking padi, si Fr. Judiel Galvo, an presenteng parish priest kan Agdangan, Baao. Walo gabos an saiyang aki asin sampolo na an mga apo. An saiyang agom nagadan sa helang sa puso kan taon 2000. An saiyang mga aki haloy na nagin kaayon sa parish choir, kaya pinagkanigo niya na magmukna kan saindang family choir na kaayon pati an mga maku-apo. Sinda minakanta sa simbahan duwang Domingo sa sarong bulan. Kun mayo an mga kasibotan na ini, siya pirmi man sanang nasa harong.

Nakasulot nin pulang daster, si Nay Placer naki-olay sa staff kan Probatica:

Anong pangyayari sa buhay mo an nakadara saimo na magdesisyon na aktibong maglingkod sa simbahan?

Nagpoon ako magserbi sa simbahan huli kan sakong mga aki. Sinda an enot na naglingkod sa simbahan sa pagigin kaayon kan Potentials of St. Anne Choir, an orihinal sa Magarao under Fr. Villamor (1972-83).

Ano an pinaka-magayon asin makangangalas na experyensya mo bilang tagapaglingkod sa simbahan?

An pagkakaigwa nin oportunidad na magheras kan liwanag nin katotoohan, an makaheras sa iba dapit sa Mahal na Diyos. Ini an tamang oras na itinao sako dahil kaidtong nagtutukdo ako sa eskwelahan dai ako makabwelo dahil bawal samo.

An makangangalas na experyensya bilang tagapaglingkod:

May Christian Life Program seminar kami, ako an team leader. Pero kan oras na idto nasa ospital ako asin naoperahan. Pinamibi ko sa Kagurangnan na tabangan niya an sakong mga kairiba. I was then assigned to talk on the topic “Siisay si Jesukristo?” Naghagad akong tabang sa Dios na itao niya sako an oportunidad na ipabisto ko siya sa samong mga bagong recruit. After five days of my operation, nagkusog boot ako na magtindog sa enotan. I prayed to God to give me strength kaya mayo lamang akong namatean na kaluyahan kan ipabisto ko si Jesus. Nagtutubod ako na an Banal na Espiritu tunay na nagtrabaho sa sako.

Ano an saimong mga pagmawot sa buhay ngonyan?

Lugod tawan Niya ako nin grasya na magibo ko an itinao niya sakong mga trabaho tanganing maski anong oras ako kuanon nin Diyos handa akong mag-atubang saiya. Pero hinahagad ko saiya na tawan niya ako nin haro-halawig pang buhay na mapamaray ko pa an paglingkod sa simbahan.

Mensahe sa mga Magaraoeños:

Maggibo nin tama sa kabotan nin Diyos asin sa atubangan nin tawo para mabuhay kita gabos sa katoninongan.

No comments: